Runi guendasicarú xti' ne ti xtalepe' xpiidxi' ca cicada, nga dunabepe' risacaca’ lu xtale guidxi huala'dxi' ndaani' guidxi Zaguita. Nácaca' xiixa xhisaca xti' ca xquenda ne xpia’ ni bialeca' lu xhi ca niru binni huala'dxi'. Yannadxí ma’ bidxaacha’ ne sincretismo post colonial; ne laca, nácaca' xquendaró ne guendarócabe laaca' naca ni rului' ca guendabiaani'yooxho'.

Lisaa Dioondi’ runibia'cabe laa sicasi ti yagahuiini' ni qué ribeedi’ guie' ne xieladi ca biidxi' ni rudii ndaani' ca cono sicarú xti'; nuu yagahuiini' nguiiu ne yagahuiini' gunaa (yagahuiini' dióicas), naro’ba’ ne naguidxi ca bandaga nápaca' ni cabiequeca’ zuchaahui’ca’ ne ribeeca’ substancias neurotóxicas sicasi cicasina ne macrozamina. Zaqueca runibia'cabe laaca’ ti nápaca' cono gunaa naro'ba' ne naxiaaca’. Caadxi sica naca ca lisaadi’ rusisacacabe laaca’ primitivo lu sica ziguiniisi ne ziguchaa ca yagahuiini'di’ bia’ xquendanabanica’ ndaani' guidxilayudi’; sica biidxi' xieladi, estructuras reproductoras simples, espermatozoides móviles, polinización ne fertilización lu gadxé gadxé estadio lu xtale beeu, ne xcaadxiru’ jmá.

Chii ne gadxe nga lisaa ni napa Dioon ne chii ne xhoopa'si nga nuu ndaani' guidxi Zaguita (rari’ nga bialeca'), ne ma' gabatiru’ ndaani' guidxilayudi' ra guidxelunu laa. Tobi ca ni jmá ribidxi binni naca Dioon spinulosum Dyer ex Eichl. Ca ni jmá nasoo ladeca’ rugaanda gacaca' jmá bia’ chii ne xhoopa' m, nalase’ ti’xhi’ ca ñee ne naro’ba' ne naga' ne cábieque ca xcoronaca’ zitu rului'ca’ yaga ziña (Figura 1) (Chamberlain, 1909). Reecheni lu ca selva medianas perennifolias ne subperennifolias xti' cuenca media xti' guiigu' Papaloapan -Veracruz ne Lula'-, lu altitud ni rindá lu gande bichii ne bia’ lu chupa lategande msnm ne lu ca layú kársticos ra nuu xtale guié caliza ne pendiente (Chamberlain, 1909). Runibia'cabe laa sicasi “begaraguhuiini’ dani” ndaani' guidxi Veracruz, o sicasi “ziña chicalite” Lula'.

Nuu caadxi guidxi huala'dxi', nabepe’ nga rusisacaca’ yagahuiini'di' runi ti sicaruni, ngueruni nabepe' nga zaduuya'nu laaca' lu ca le’ xti' ca yoo o ca parque ne ca plaza; ne zaqueca, ca xpiidxi'ca' riquiiñe'cabe laaca' sica guendaró. Ndi' la, nácani ti dxiiña’ ni runi ca binni guidxi Chinanteca ne ca binni ra ñaa xti' cuenca xti' guiigu' Papaloapan, cá lu gui’chi' maca racani niru ñedandá ca binnixtiá, (Bonta et al., 2019). Ti ganda gócabe laaca’, ra ma' gúlacani, naquiiñe' guibidxicani, gatacani lu dxiá ne racaru’, guiaaxha guidiladicani ne gagui’cani ndaani' nisa guiuu nabani, ne racaru' guiree almidón ni guiuu lu cuba gacané guetaguu, nisiaaba’, guetahuiini’ o gueta gagui’ lu dxiá (Chamberlain, 1909; Vázquez-Torres et al., 1989; Bonta et al., 2019). Ndaani' guidxi Veracruz, ca binniñaa ruzeeteca’ gatigá nga rócani, lu xhi gusibá o ra rixie’ guendaró; ne ca binnigola, rietenala'dxi'ca' lu xhi revolución mexicana, ca biidxi'di’ gudócabe laaca' ne gucanecani ti ñanda nidi’di’cabe ca dxi naganaque (Chamberlain, 1909; Bonta et al., 2019).

Runi guendasicarú xti' ne ti dunabepe' naro’ba’ca’, ca yagahuiini'di' nabé risacaxhaata’ca’, ra ma' gulaca' raxhacabe laaca' ndaani' gui'xhi', ti naga'chi’ gutoocabe laaca’; ndi' ne runi guendaridxaa sica riquiiñe'cabe ca layú, huayunica’ guiete lu ra ridoo ne rireechecani, gacaná habitat ne guidxaa sica bia’ nácaca' (Vovides et al., 2022). Yanna ca ni bia’ nuuca rului’ca’ dunabepe' nga nalaa nuuca’, ne riné laaca’ guiuuca’ ndaani' guidxi Lula'si (Gutiérrez-Ortega et al., 2024). Lu norma mexicana NOM-059 ná, nu guiniti lisaadi' ne sica ná lista naxiñá' xti' UICN, nuuni lu categoría de riesgo.

• Bonta M, Pulido-Silva MT, Diego-Vargas T, Vite-Reyes A, Vovides A P, Cibrián-Jaramillo A. 2019. Ethnobotany of Mexican and northern central American cycads (Zamiaceae). Journal of Ethnobiology and Ethnomedicine 15:1-34. https://link.springer.com/article/10.1186/s13002-018-0282-z
• Chamberlain CJ. 1909. Dioon spinulosum. Botanical Gazette 48(6): 401-413. https://www.journals.uchicago.edu/doi/pdf/10.1086/330062
• Gutiérrez‐Ortega JS, Pérez‐Farrera MA, Sato MP, Matsuo A, Suyama Y, Vovides AP, Molina-Freaner F, Kajita T, Watano Y. 2024. Evolutionary and ecological trends in the Neotropical cycad genus Dioon (Zamiaceae): An example of success of evolutionary stasis. Ecological Research 39(2): 131-158. https://doi.org/10.1111/1440-1703.12442.
• Vázquez-Torres SM, Sánchez Tinoco MY, Alejandre Rosas JA. 1989. Algunos datos etnobotánicos sobre las Zamiaceae (Cycadales) de México. Centro de Investigaciones Biológicas, Universidad Veracruzana. https://cdigital.uv.mx/server/api/core/bitstreams/a756a409-bef5-41de-94fc-c0e686b0f446/content
• Vovides AP, Chemnick J, Gregory T. 2022. Dioon spinulosum (errata version published in 2023). The IUCN Red List of Threatened Species 2022: e.T42149A243387612. https://dx.doi.org/10.2305/IUCN.UK.2022-1.RLTS.T42149A243387612.en.